2Cor 5 | ZomZIV | STEP | Tu-in eite tenna leibuk a kisiat leh mihing khut tawh kibawl lo, Pasian bawlsa tawntung inn khat vantungah i neih lam i thei hi.

2 Corinthians 5

Eite Tenna Vantung

1 Tu-in eite tenna leibuk a kisiat leh mihing khut tawh kibawl lo, Pasian bawlsa tawntung inn khat vantungah i neih lam i thei hi. 2 Tu laitakin vantunga ten nading hong kisilhsak ding lunggulhin i thum i tau hi. 3 Bang hang hiam cih leh eite hong kisilhsak ciangin guaktangin i om kei ding hi; 4 ahang in, eite hih buk sungah i om laitakin hong kigimsaka i tau hi; tua pen silh loh ding i ut man hi loin i vantung tenna hong kisilhsak ding i ut man le a sithei pen nuntakna in a valh ding i ut man hizaw hi. 5 Tua hi-a hih ding mah a eite hong bawl Pasian in hong tung ding khamkholhna-in Kha hong piakhol zo hi.

6 Tua ahi manin eite muangtakin i om den a, i pumpi-a i om laitengin Topa kiang tawh i kigamlat lam lah i thei hi. 7 Eite muhna tawh nungta loin upna tawh i nungta hi. 8 Eite lungmuangtakin i om a, pumpi nusia-in Topa tawh inn a omkhawm ding i utzaw lai hi, ka ci hi. 9 Tua hi-a i pumpi inn ah i om a, i om kei zongin amah i lungdamsak ding i tuppi pen ahi hi. 10 Ahang in, eite khempeuh Christ thukhenna tokhom mai-ah i ding pelmawh ding hi. Tua ciangin mi khempeuh in asia ahi zongin apha ahi zongin, pumpi-a a om sunga a hihsate hangin amau ngah dinga kituakte a sang ding uh hi. ^a

Kilemkikna Nasep

11 Tua ahi ciangin kote in Topa kihtakzia ding thei ka hi manun mite zol ding ka hahkat uh hi. Kote ka hi bangun Pasian mai-ah a kiteltakin ka kilang uh a, tua pen mah note in zong na lungsim uh tawh na theihtel ding uh ka lamen hi. 12 Lung sunga om pen hi lo, a kimu thei pen a kisaktheihpihte na dawn theih nadingun note tungah hong kisial kik ka hi kei uh a, kote nong kisaktheihpih nadingun hun hoih hong bawlsak ka hizaw uh hi. 13 Kote ka hai uh leh Pasian hang ahi hi; ka hai kei uh leh note ading ahi hi. 14 Ahang in, mi khempeuh adingin mi khat si-a, tua ahi manin mi khempeuh si hi, cih taksang takpi ka hi manun Christ itna in kote hong sawl teitei hi. 15 Tua hi-a ama hangin a nungtate amau adingin nungta nawn loin amau adingin si-a, a tho kiksakpa adingin a nuntak theih nadingun amah mi khempeuh tangin a si hi.

16 Tua ahi ciangin tu-a kipan kote in leitung mite muh bangin kuamah ka mu kei uh hi. Khatvei lai-in hih bangin Christ ka na mu uh a, tu-in ka mu nawn kei uh hi. 17 Tua ahi ciangin mi khatpeuh Christ ah a om leh amah piansak thak ahi hi; alui pen beimanga, athak a tung zo hi! 18 Hihte khempeuh Christ tungtawna kote amah tawh hong kilemkiksaka kilemna nasep hong piapa Pasian tung pan ahi hi: 19 Pasian in Christ tungtawnin leitung amah tawh kilemsaka, mihingte mawhna amaute mawhna-in a simsak kei hi. Tua hi-a, tua kilemkiksakna thupuak kote hong kemsak hi. 20 Tua ahi manin kote tungtawnin Pasian in hih ngetna hong bawl bangin kote Christ palaite ka hi uh hi. Kote in Christ tangin: Pasian tawh kilemkik un, ci-in kong thum uh hi. 21 Eite ama tungtawnin Pasian thumaanna i suah theih nadingin Pasian in mawhna a nei lo amah eite adingin mawhna ^{▼▼5.21 Ahikeh mawhna khat hanga biakna} a suaksak hi. ^c